LDK synon forcimin e strukturave dhe koordinimin politik në Kryeqytet përmes një mekanizmi të ri vendimmarrës
Lidhja Demokratike e Kosovës (LDK) ka njoftuar anëtarësinë për rifunksionalizimin e Kolegjiumit të Degëve në Prishtinë, në kuadër të procesit të riorganizimit të brendshëm dhe në përputhje me autorizimet e Kuvendit të partisë.
Sipas njoftimit, ky kolegjium do të shërbejë si një mekanizëm i rëndësishëm për koordinim dhe vendimmarrje, duke synuar harmonizimin e qëndrimeve politike të LDK-së për çështjet që lidhen me Kryeqytetin. Qëllimi është një përfaqësim më i unifikuar dhe më i qëndrueshëm në nivel politik dhe institucional.
LDK ka bërë të ditur se së shpejti do të miratohen edhe aktet normative që do të rregullojnë organizimin, kompetencat dhe funksionimin e këtij organi, me synim rritjen e efikasitetit dhe transparencës në veprimtarinë politike.
Po ashtu, është paralajmëruar një takim me asambleistët e LDK-së në Prishtinë, për të koordinuar veprimet në Kuvendin Komunal dhe për të avancuar qëndrimet e përbashkëta politike.
Në fokus të angazhimit të LDK-së mbetet zbatimi i programit për Kryeqytetin, me theks në përmirësimin e shërbimeve publike, zhvillimin urban të qëndrueshëm dhe rritjen e cilësisë së jetës për qytetarët.
Ky hap, sipas partisë, synon konsolidimin e mëtejshëm të LDK-së si alternativë kryesore e djathtë dhe forcimin e përfaqësimit të saj në Prishtinë.
