Kryetari i LDK-së premton 1.5 miliardë euro investime për kryeqytetin dhe kritikon Qeverinë aktuale.
Kryetari i Lidhjes Demokratike të Kosovës (LDK), Lumir Abdixhiku, ka vizituar lagjen Bregu i Diellit në Prishtinë, ku është takuar me qytetarë dhe simpatizantë të kësaj partie, duke përcjellë mesazhe kritike ndaj Qeverisë aktuale dhe premtime për zhvillimin e kryeqytetit.
Nga ky takim, Abdixhiku ka publikuar edhe një video në rrjetet sociale, ku shihet i rrethuar nga mbështetës të LDK-së, ndërsa flet për nevojën që Prishtina të ketë një qeverisje që, sipas tij, nuk e bllokon dhe nuk e saboton zhvillimin e saj.
“Prishtina e meriton një Qeveri që nuk e bllokon, nuk e saboton, por e ndihmon. E zhvillon”, ka deklaruar Abdixhiku.
Ai ka theksuar se LDK-ja ka një plan konkret për kryeqytetin, duke premtuar investime të mëdha financiare. “Qiti paret. Plot 1.5 miliardë euro për Kryeqytetin tonë”, ka shkruar Abdixhiku në rrjetet sociale.
