Kreu i Bashkimi Demokratik për Integrim thekson nevojën për qeverisje të qëndrueshme, partneritet të përhershëm me Shtetet e Bashkuara të Amerikës dhe integrim të pakthyeshëm në Bashkimi Evropian.
Kryetari i Bashkimit Demokratik për Integrim, Ali Ahmeti, ka uruar Kryetarin e Lëvizjes Vetëvendosje, Albin Kurti, për zgjedhjen në detyrën e Kryeministrit të Republikës së Kosovës.
Në mesazhin e tij, Ahmeti shprehet se, si një nga ata që vitet më vendimtare të jetës i ka kaluar në përpjekje për liri, dinjitet dhe shtetësi, i uron Kurtit një mandat të suksesshëm në krye të ekzekutivit.
Ai thekson se Kosova ka nevojë për një qeverisje që forcon sovranitetin, konsolidon institucionet, nxit zhvillimin ekonomik dhe garanton barazinë para ligjit. Sipas tij, Republika ka nevojë për vendime të menduara thellë dhe hapa të sigurt që e çojnë përpara stabilitetin dhe mirëqenien e qytetarëve.
Ahmeti shprehet i bindur se e ardhmja e Kosovës ndërtohet mbi partneritetin e përhershëm me Shtetet e Bashkuara të Amerikës dhe mbi rrugën e pakthyeshme të integrimit në Bashkimin Evropian, si bosht i orientimit të saj strategjik dhe qytetërues.
Në fund të mesazhit, ai i uron Kurtit vendimmarrje me vizion, qëndrueshmëri në veprim dhe lidership që bashkon energjitë e vendit në shërbim të së mirës së përgjithshme dhe të brezave që vijnë.
