Deputeti thotë se vendi duhet t’i kthehet vendimit të qytetarëve, ndërsa akuzon pushtetin për përpjekje për kontroll të plotë të institucioneve.
Deputeti i Partisë Demokratike të Kosovës, Eman Rrahmani, ka akuzuar kryeministrin Albin Kurti dhe Lëvizjen Vetëvendosje se po frikësohen nga zgjedhjet dhe nga humbja e pushtetit.
Në një reagim publik, Rrahmani tha se situata është e rëndë për qeverinë, duke pretenduar se nga një plan për kontroll të plotë të institucioneve të shtetit tani ka kaluar në fazën e viktimizimit dhe përpjekjes për ta ruajtur pushtetin me çdo kusht.
Ai theksoi se që nga dita e parë si deputet ka kërkuar që vendi të shkojë në zgjedhje, duke vlerësuar se kthimi i vendimit te qytetarët është mënyra më e drejtë për të zgjidhur situatën politike.
Sipas tij, sulmet ndaj Presidentes Vjosa Osmani janë hakmarrje politike për shkak të qëndrimeve të saj ndaj kryeministrit dhe partisë në pushtet.
Rrahmani pretendoi gjithashtu se pas takimit të Osmanit me Donald Trump, brenda strukturave të Vetëvendosjes nuk ka pasur diskutime për ta votuar atë për presidente, por përkundrazi përpjekje që ajo të mos zgjidhej.
Ai shtoi se Kurti ka qenë i bindur se partitë opozitare nuk do të pranonin të shkonin në zgjedhje dhe do të detyroheshin të votonin edhe kandidatë të tjerë për president, duke përmendur edhe emrin e Fatmire Kollçaku si një mundësi të përfolur.
Në fund të reagimit, Rrahmani tha se koha e kalkulimeve politike dhe propagandës për pushtet po përfundon dhe se vendimi përfundimtar duhet t’u takojë qytetarëve përmes zgjedhjeve.
