Nënkryetarja e Kuvendit të Kosovës nga Vetëvendosje, Albulena Haxhiu, ka thënë se Kuvendi ka legjitimitet dhe kapacitet për të ushtruar punën e tij, edhe pse mbledhja e Kryesisë nuk u mbajt të hënën.
“Përveç kryetarit kemi edhe 4 nënkryetarë, dhe sot vetëm edhe njërin prej tyre ta kishim pasur do të mund të mbanim mbledhjen e Kryesisë sepse duhen 4 anëtarë që mbledhja të fillojë”, u shpreh ajo para mediave, përcjell Koha.net.
Haxhiu tha se situata aktuale nuk është ideale dhe se zgjidhja më e mirë do të ishte që deputeti nga komuniteti serb, Nenad Rashiq, të zgjidhej nënkryetar. Për moszgjidhjen e tij, ajo akuzoi partitë opozitare.
“Nuk mundet që ky Kuvend të mbahet peng nga Lista Serbe apo i kalkulimeve të ndonjë subjekti që refuzon të marrë përgjegjësi … Opozita nuk ka votë kundër Listës Serbe, ka votë kundër për mua, për zonjën Donika Gërvalla, për Hekuran Muratin, për Arbërie Nagavcin, por jo për Listën Serbe”, ka theksuar Haxhiu.
