Udhëheqja e Iranit paralajmëroi të dielën për rrezikun e një konflikti rajonal nëse Shtetet e Bashkuara do ta sulmonin vendin, duke rritur më tej tensionet mes Uashingtonit dhe Teheranit, ndërsa në një hap hakmarrës i shpalli ushtritë e Bashkimit Evropian si “grupe terroriste”, shkruan Reuters, transmeton Gazeta Politika.
Shtetet e Bashkuara kanë shtuar praninë e tyre detare në Lindjen e Mesme, pasi presidenti Donald Trump ka kërcënuar vazhdimisht Iranin me ndërhyrje nëse ai nuk pranon një marrëveshje bërthamore ose nëse nuk ndalon vrasjen e protestuesve.
Pavarësisht përplasjes mes udhëheqësve klerikalë të Iranit dhe administratës Trump, të dyja palët kanë sinjalizuar se janë të gatshme të rifillojnë bisedimet, ndërsa aleatë rajonalë si Turqia kanë bërë thirrje për ulje të tensioneve.
Një zyrtar iranian mohoi një raport të mëhershëm të televizionit shtetëror Press TV, sipas të cilit forcat detare të Gardës Revolucionare do të zhvillonin stërvitje me zjarr të vërtetë në Ngushticën e Hormuzit të dielën dhe të hënën, duke i thënë Reuters-it se nuk ka plane të tilla dhe se raportimet mediatike janë të pasakta.
Udhëheqësi Suprem, Ajatollah Ali Khamenei, u citua nga mediat shtetërore të ketë thënë se, edhe pse Trump thotë se ka dërguar anije në rajon, “kombit iranian nuk i frikësojnë këto gjëra, populli iranian nuk do të tronditet nga këto kërcënime”.
“Ne nuk jemi iniciatorë dhe nuk duam të sulmojmë asnjë vend, por kombi iranian do t’i japë një goditje të fortë kujtdo që e sulmon ose e ngacmon,” tha ai.
Marina amerikane aktualisht ka gjashtë shkatërrues, një aeroplanmbajtëse dhe tre anije luftarake bregdetare në rajon, duke rritur rrezikun e luftës pas shtypjes së përgjakshme nga Irani në janar të protestave mbarëkombëtare kundër udhëheqjes iraniane.
Reuters ka raportuar, duke cituar disa burime, se Trump po shqyrtonte opsione kundër Iranit, përfshirë sulme të synuara ndaj forcave të sigurisë.
Të shtunën, Trump u tha gazetarëve se Irani po “flet seriozisht” me Uashingtonin, disa orë pasi zyrtari më i lartë i sigurisë në Teheran, Ali Larijani, deklaroi në platformën X se po përgatiteshin marrëveshjet për negociata.
Trump shtoi: “Shpresoj që të negociojnë diçka të pranueshme. Mund të arrihet një marrëveshje e negociuar që do të ishte e kënaqshme, pa armë bërthamore.”
Teherani thotë se është i gatshëm për negociata “të drejta”, që nuk synojnë kufizimin e aftësive të tij mbrojtëse.
Protestat, të cilat nisën për shkak të vështirësive ekonomike, por u shndërruan në sfidën më serioze politike për Republikën Islamike që nga themelimi i saj në vitin 1979, tani janë shuar pas represionit.
Sipas shifrave zyrtare, numri i të vdekurve nga trazirat është 3.117, ndërsa grupi për të drejtat e njeriut HRANA, me bazë në SHBA, tha të dielën se deri tani ka verifikuar vdekjen e 6.713 personave. Reuters nuk ishte në gjendje t’i verifikonte në mënyrë të pavarur këto shifra.
Në një ndryshim simbolik pas shtypjes së protestave, Bashkimi Evropian të enjten e shpalli Gardën Revolucionare Islamike (IRGC) si organizatë terroriste.
Në hakmarrje, të dielën kryetari i Parlamentit iranian, Mohammad Baqer Qalibaf, tha se edhe ushtritë e BE-së do të shpalleshin të tilla dhe se autoritetet do të shqyrtonin dëbimin e atasheve ushtarakë të shteteve të BE-së.
“Duke u përpjekur të godasin Gardën Revolucionare… evropianët në fakt i ranë vetes në këmbë,” u tha ai ligjvënësve, të cilët mbanin të gjithë uniforma të IRGC-së në shenjë mbështetjeje për këtë forcë elitare.
Pas fjalimit të tij, ligjvënësit brohoritën: “Vdekje Amerikës, turp për ju Evropë”.
