Forcat Mbrojtëse të Izraelit (IDF) kanë konfirmuar se kanë nisur sulme ajrore në kryeqytetin iranian, Teheran, si dhe në kryeqytetin libanez, Bejrut. Mediat ndërkombëtare kanë publikuar foto, ku shfaqen shtëllunga tymi të zi në qiellin mbi periferitë jugore të Bejrutit.
“IDF aktualisht po kryen sulme të njëkohshme kundër objektivave ushtarake në Teheran dhe Bejrut”, tha ajo në një deklaratë, raporton A2CNN.
Zëdhënësi i IDF-së në gjuhën arabe, Avichay Adraee, tha se “një valë sulmesh ajrore të gjera” ishte duke u zhvilluar.
Sulmet vijnë rreth një orë pasi IDF lëshoi një “paralajmërim urgjent” për njerëzit në periferitë jugore të Bejrutit dhe në dhjetëra fshatra, duke u bërë thirrje atyre të evakuohen.
IDF kishte thënë se po synonte qendrat e komandës dhe objektet e magazinimit që i përkisnin Hezbollahut.
SHBA-të dhe Izraeli sulmuan Iranin të shtunën, duke vrarë Udhëheqësin Suprem Ajatollah Ali Khamenei. Irani është hakmarrë me një valë sulmesh në të gjithë rajonin.
