Policia dhe zjarrfikësit intervenuan menjëherë; i lënduari mori trajtimin e nevojshëm mjekësor.
Zëdhënësi i Policisë së Kosovës për rajonin e kryeqytetit, Enis Pllana, ka njoftuar se një person është lënduar si pasojë e një zjarri që ka përfshirë një banesë në lagjen “Bregu i Diellit” në Prishtinë.
Sipas Pllanës, rasti është raportuar sot rreth orës 07:00, ndërsa në vendin e ngjarjes kanë dalë menjëherë njësitë policore dhe zjarrfikësit. Personi i lënduar ka marrë trajtimin e duhur mjekësor.
“Sot rreth orës 07:00, kemi pranuar informatën për një incident zjarri në lagjen ‘Bregu i Diellit’ në Prishtinë, ku nga zjarri është përfshirë një banesë. Policia dhe zjarrfikësit kanë dalë menjëherë në vendin e ngjarjes, kurse një person ka pranuar tretman mjekësor. Aktualisht policia dhe zjarrfikësit janë duke u marrë me rastin”, ka deklaruar Pllana.
Autoritetet janë ende duke e hetuar shkakun e zjarrit.
