Njësia elitare e ushtrisë amerikane, e specializuar në misione të fshehta dhe me rrezik të lartë, veproi me urdhër të autoriteteve më të larta të SHBA-së.
Një njësi elitare e operacioneve speciale të Ushtrisë Amerikane, e njohur si Delta Force, ka kryer të shtunën operacionin për kapjen e udhëheqësit venezuelian Nicolás Maduro dhe bashkëshortes së tij, raporton CNN.
Delta Force konsiderohet një nga njësitë më të specializuara të ushtrisë amerikane dhe është e trajnuar për misione kundërterrorizmi, shpëtim pengjesh, veprime të drejtpërdrejta dhe operacione të avancuara zbulimi, zakonisht kundër objektivave me vlerë të lartë.
E themeluar në vitin 1977, njësia vepron drejtpërdrejt nën Komandën e Përbashkët të Operacioneve Speciale (Joint Special Operations Command – JSOC) dhe është e stacionuar në Fort Bragg, Karolina e Veriut. Ajo përbëhet nga tetë skuadrone operacionale, të njohura si “sabre”.
Pothuajse të gjitha detajet mbi veprimtarinë e Delta Force mbeten të klasifikuara në nivel shumë të lartë. Në përgjithësi, kjo njësi angazhohet në disa nga misionet më komplekse, më të fshehta dhe më të rrezikshme, të kryera vetëm me urdhër të Presidentit të Shteteve të Bashkuara dhe Sekretarit amerikan të Mbrojtjes.
