Deputeti i Lëvizjes Vetëvendosje, Adnan Rrustemi, ka thënë se është i bindur se presidentja aktuale Vjosa Osmani s’i ka pasur 80 votat e nevojshme për t’u rizgjedhur.
Osmani në një intervistë për “Syri TV” tha se e kishte të sigurt rizgjedhjen, po të ishte kandiduar nga Lëvizja Vetëvendosje si kandidate.
Rrustemi për KOHËN tha se është i bindur se Osmani se ka pasur përkrahjen e nevojshme.
“Unë jam i bindur që as zonja Osmani nuk i ka pasur votat. Ne i kemi ofruar mundësinë e kandidimit dhe kemi besuar se kandidimi i saj krahas kandidimit të zotëri Konjufcës është një mundësi për të maksimizuar pjesëmarrjen e deputetëve në proces zgjedhor dhe kësisoj për ta tejkaluar rrezikun e kuorumit apo pjesëmarrjes të së paku 80 deputetësh në procesin zgjedhor në raundin e parë dhe të dytë dhe kësisoj t’i japim Republikës president apo presidente. Ne kemi besuar që profilet e këtyre dy kandidatëve e zgjerojnë bazën e pjesëmarrjes së deputetëve nga të gjitha krahët. Do të ishte një mundësi e madhe që te kemi deputetë të cilët marrin pjesë në procesin e votimit, marrë parasysh profilin e të dyve”, tha Rrustemi.
