Drafti mbështet integrimin e Kosovës në NATO dhe BE, dialogun me Serbinë dhe kundërshton çdo ndarje etnike të territorit.
Në draft-ligjin e autorizimeve të mbrojtjes kombëtare të Shteteve të Bashkuara për vitin 2026, Kosova dhe Ballkani Perëndimor përfshihen në qëndrime strategjike që theksojnë mbështetjen për stabilitetin dhe zhvillimin demokratik në rajon.
Ish-deputeti i Kuvendit të Kosovës dhe aktivist për të drejtat e shqiptarëve në SHBA, Faton Bislimi, ka bërë të ditur se drafti tashmë ka marrë miratimin e Senatit dhe po finalizohet në Kongres për aprovim përfundimtar, pas të cilit do t’i dërgohet presidentit amerikan për dekretim.
Teksti i draft-ligjit, që përmban rreth 3 mijë faqe, përfshin politika të rëndësishme për sigurinë kombëtare të SHBA-së dhe, për herë të parë, kodifikon qasjen e Shteteve të Bashkuara ndaj Kosovës dhe rajonit. Ligji mbështet integrimin e Kosovës dhe vendeve të rajonit në NATO dhe BE, promovon dialogun Kosovë–Serbi mbi bazën e njohjes reciproke dhe kundërshton çdo ide për ndarje apo shkëmbim territoresh mbi baza etnike.
Dokumenti gjithashtu synon të nxisë zbatimin e marrëveshjeve ekzistuese, fillimin e dialogut strategjik dhe iniciativat ekonomike në Ballkan, duke theksuar rëndësinë e përforcimit të sigurisë, stabilitetit dhe zhvillimit demokratik në rajon.
