Pas miratimit nga Dhoma e Përfaqësuesve dhe Senati, Presidenti amerikan rikthen punonjësit federalë në punë, duke zgjidhur përkohësisht krizën financiare të administratës.
Presidenti i Shteteve të Bashkuara, Donald Trump, ka nënshkruar legjislacionin që i jep fund mbylljes më të gjatë të qeverisë në historinë e vendit. Vendimi vjen pasi Dhoma e Përfaqësuesve votoi për të rifilluar programet e ndihmës ushqimore, për të paguar qindra mijëra punonjës federalë dhe për të rivendosur funksionimin e plotë të kontrollit të trafikut ajror.
Pakoja ligjore u miratua nga Dhoma e Përfaqësuesve, e kontrolluar nga republikanët, me 222 vota pro dhe 209 kundër. Mbështetja e Presidentit Trump luajti rol kyç në mbajtjen e unitetit brenda partisë republikane, pavarësisht kundërshtimit të fortë nga demokratët.
Me nënshkrimin e Trump, punonjësit federalë pritet të kthehen në vendet e tyre të punës që nga e enjtja, megjithëse ende mbetet e paqartë se sa kohë do të duhet për rikthimin e plotë të shërbimeve qeveritare.
Sipas marrëveshjes, financimi i përkohshëm i qeverisë do të zgjasë deri më 30 janar, ndërsa borxhi kombëtar amerikan – aktualisht në 38 trilionë dollarë – pritet të vazhdojë të rritet me rreth 1.8 trilionë dollarë në vit.
