Kreu i LDK-së thotë se kërkesa për drejtësi ndaj viktimave të pasluftës ishte “akt minimalist human”
Kryetari i Lidhja Demokratike e Kosovës, Lumir Abdixhiku, ka komentuar miratimin e rezolutës në Kuvend për mbështetjen e krerëve të Ushtria Çlirimtare e Kosovës që po gjykohen në Dhomat e Specializuara të Kosovës në Hagë, duke e cilësuar si të gabuar refuzimin e amendamentit të propozuar nga LDK për përfshirjen e një paragrafi mbi drejtësinë për vrasjet politike pas luftës.
Rezoluta, e prezantuar nga Partia Demokratike e Kosovës, mori 90 vota pro, një kundër dhe asnjë abstenim. LDK-ja kishte deklaruar mbështetje në parim, por kërkoi që në tekst të përfshihej edhe një pikë për zbardhjen dhe dhënien e drejtësisë për vrasjet politike. Kjo kërkesë u refuzua me arsyetimin se teksti ishte hartuar nga një grup ekspertësh dhe nuk mund të ndryshohej.
Duke folur në emisionin Debat Plus, Abdixhiku tha se përfshirja e atij paragrafi do të ishte një akt i drejtë dhe i domosdoshëm.
“LDK-ja as nuk është sponsorizuese e as ideatore e rezolutës, por beson në plotni që lufta e UÇK-së është luftë sublime e popullit të Kosovës, sepse vetë populli i Kosovës është UÇK-ja. Ta godasësh UÇK-në e godet edhe popullin e Kosovës dhe LDK-në… Në rastin e rezolutës kishte një kërkesë të deputetëve tanë që të përfshihej një paragraf. Dhe kishte një refuzim. Në rrethana të tilla paragrafi ishte shumë human, shumë i thjeshtë, shumë njerëzor. Ishte gabim refuzimi i tij. Të kërkosh drejtësi për vrasjet e njerëzve tanë është akt minimalist human për secilin njeri. Mos e bëni betejë partiake se nuk është…”, ka thënë Abdixhiku.
Pas refuzimit të amendamentit të propozuar nga deputetët e LDK-së, kjo parti nuk mori pjesë në votim. Kundër rezolutës votoi vetëm deputeti i Lëvizja Vetëvendosje, Fatos Geci, ndërsa Lista Serbe nuk ishte e pranishme në sallë.
