Dy vendet nënshkruajnë letër qëllimi për projekte të mëdha në industrinë e mbrojtjes.
Ukraina dhe Franca kanë rënë dakord të fillojnë prodhimin e përbashkët të armëve, në kuadër të thellimit të bashkëpunimit në sektorin e mbrojtjes mes dy vendeve.
Lajmin e bëri të ditur të hënën ministri ukrainas i Mbrojtjes, Mykhailo Fedorov, pasi priti në Kiev homologun e tij francez. Sipas tij, palët kanë nënshkruar një letër qëllimi që hap rrugën për realizimin e “projekteve të përbashkëta në shkallë të gjerë në sektorin e industrisë së mbrojtjes”.
Fedorov nuk dha detaje konkrete mbi llojin e armëve që do të prodhohen apo afatin kohor për nisjen e prodhimit, por theksoi se marrëveshja synon forcimin e kapaciteteve mbrojtëse të Ukrainës dhe rritjen e bashkëpunimit strategjik me Francën.
Ky zhvillim vjen në një kohë kur Ukraina po kërkon të zgjerojë partneritetet me vendet perëndimore për të përforcuar industrinë e saj ushtarake dhe për të siguruar mbështetje afatgjatë në fushën e mbrojtjes.
