Kryetari i Gjakovës vlerëson ligjin amerikan si mbyllje përfundimtare të debatit për kufijtë dhe thirrje për konsolidim të shtetit dhe demokracisë.
Kryetari i Komunës së Gjakovës, Ardian Gjini, ka deklaruar se burimi më i fuqishëm i destabilitetit në Ballkan ndër vite ka qenë ideja dhe shpresa për ndryshimin e kufijve të shteteve ekzistuese.
Sipas Gjinit, Serbia ka sabotuar në mënyrë të vazhdueshme konsolidimin e shteteve dhe demokracisë në Bosnje dhe Kosovë, pikërisht për shkak të synimeve që lidhen me ndryshimin e kufijve. Ai thekson se kjo qasje ka penguar stabilitetin rajonal dhe zhvillimin demokratik.
“Burimi më i fuqishëm i destabilitetit në Ballkan ka qenë ideja dhe shpresa e ndryshimit të kufinjëve të shteteve ekzistuese. Serbia, në pjesën më të madhe, e ka sabotuar me të gjitha mjetet konsolidimin e shteteve dhe demokracisë në Bosnje dhe Kosovë mu për shkak të këtij qëllimi,” ka shkruar Gjini.
Ai ka përshëndetur vendimin e Shteteve të Bashkuara të Amerikës për ta mbyllur këtë çështje përmes një ligji, duke e cilësuar atë si rikonfirmim të politikës afatgjatë amerikane ndaj Ballkanit.
“Shtetet e Bashkuara të Amerikës me një ligj e mbyllën këtë çështje. Ky rikonfirmim i politikës afatgjatë të SHBA kundrejt Ballkanit është lajmi më i mirë që e kemi pranuar pas shumë viteve,” thekson ai.
Në fund, Gjini u bën thirrje institucioneve dhe aktorëve politikë që të fokusohen në forcimin e shtetit dhe demokracisë, duke paralajmëruar se çdo qasje tjetër vetëm sa do të vonojë rritjen e mirëqenies dhe sigurisë për qytetarët.
“Tani, bëhuni gati për ta konsoliduar shtetin dhe demokracinë. Kushdo që mendon ndryshe, vetëm sa do e vonojë rritjen e mirëqenies dhe sigurisë së popullit të vet,” përfundon Gjini.
