Gjykata përcaktoi se Kuvendi duhet të përfundojë seancën konstituive brenda 12 ditësh nga hyrja në fuqi e aktgjykimit, duke vazhduar ndërkohë masa e përkohshme.
Gjykata Kushtetuese e Kosovës ka vendosur se Kuvendi nuk konsiderohet i konstituuar, pasi seanca e nisur më 15 prill 2025 nuk është përmbyllur me zgjedhjen e nënkryetarit nga komuniteti serb, siç përcakton Kushtetuta.
Në aktgjykimin e shpallur, Gjykata theksoi se procesi duhet të përfundojë brenda një afati 12-ditor, i cili fillon të rrjedhë pas publikimit të vendimit në Gazetën Zyrtare. Deri atëherë, mbetet në fuqi masa e përkohshme e vendosur më 5 shtator 2025.
Gjykata urdhëroi të gjithë deputetët që gjatë procedurës të respektojnë Kushtetutën dhe Rregulloren e Kuvendit, duke ushtruar funksionin e tyre në interes të Republikës së Kosovës.
Ky aktgjykim hyn në fuqi ditën e publikimit dhe i komunikohet palëve, ndërsa publikimi i tij në Gazetën Zyrtare do ta bëjë detyrimin përfundimtar.
