Pas zgjedhjes së kryetares dhe pesë nënkryetarëve, pritet që në mbrëmje të mbahet seanca për formimin e ekzekutivit të ri.
Kryetarja e sapozgjedhur e Kuvendit të Kosovës, Albulena Haxhiu, e ka shpallur të konstituuar institucionin ligjvënës, pas përfundimit të procesit të zgjedhjes së saj dhe të pesë nënkryetarëve.
Me këtë hap, Kuvendi nis zyrtarisht punën për legjislaturën e re, duke hapur rrugën për formimin e institucioneve të tjera të vendit.
Haxhiu paralajmëroi se gjatë ditës do të mbahet edhe një seancë tjetër, ajo për votimin e Qeverisë së re të Kosovës. Sipas informacioneve, seanca për votimin e kabinetit “Kurti 3” pritet të zhvillohet rreth orës 19:00.
Në këtë seancë deputetët do të vendosin për përbërjen e ekzekutivit të ri të udhëhequr nga Albin Kurti.
