Zohran Mamdani u zotua se do të hapë një epokë të re për Nju Jorkun në fjalimin e tij të parë si kryebashkiak, duke premtuar se do të qeverisë “në mënyrë gjithëpërfshirëse dhe të guximshme” për të përmbushur premtimet elektorale dhe për të përmirësuar jetën e miliona njujorkezëve që, sipas tij, janë “braktisur” nga administratat e mëparshme.
Në fjalimin e tij inaugurues, Mamdani u shpreh se synon ta “rishpikë” Nju Jorkun, duke theksuar se do të udhëheqë me guxim dhe ambicie.
Pasi punoi një pjesë të natës në zyrën e tij të re, kryebashkiaku i ri u kthye në Bashkinë e qytetit rreth mesditës me taksi për një paraqitje publike më madhështore. Aty, senatori amerikan Bernie Sanders – një nga heronjtë politikë të deklaruar të Mamdanit – i administroi betimin për herë të dytë.
“Që nga sot, ne do të qeverisim në mënyrë gjithëpërfshirëse dhe të guximshme. Mund të mos kemi gjithmonë sukses, por kurrë nuk do të akuzohemi se na mungoi guximi për të provuar,” tha Mamdani përpara një turme mbështetësish entuziastë.
“Për ata që këmbëngulin se epoka e qeverisë së madhe ka marrë fund, dëgjojeni mirë këtë: Bashkia e Nju Jorkut nuk do të hezitojë më të përdorë fuqinë e saj për të përmirësuar jetën e qytetarëve,” shtoi ai.
Qindra njerëz morën pjesë në ceremoninë e inaugurimit, pavarësisht të ftohtit të acartë, në jug të Bashkisë, në një pjesë të Broadway-t të njohur si “Kanioni i Heronjve”, i famshëm për paradat me shirita letre.
Në fjalimin e tij drejtuar qytetit, Mamdani theksoi se nuk do të tërhiqet nga premtimet e fushatës për të përmirësuar jetën e miliona njujorkezëve, të cilët, sipas tij, janë injoruar nga administratat e mëparshme.
“Momente të tilla vijnë rrallë. Rrallëherë kemi një mundësi kaq të madhe për të transformuar dhe rishpikur. Dhe akoma më rrallë ndodh që vetë njerëzit të kenë në duar levat e ndryshimit,” tha Mamdani.
“E megjithatë, në të kaluarën tonë, shumë shpesh këto momente të mëdha janë sakrifikuar për shkak të mungesës së imagjinatës dhe ambicies,” shtoi ai.
Mamdani pranoi se sfidat përpara do të jenë të mëdha, duke theksuar se e gjithë SHBA-ja, madje edhe bota, po vëzhgon për të parë nëse e majta politike mund të qeverisë me sukses. Ai u zotua se do të bëjë gjithçka që premtimet e tij elektorale të realizohen.
“Ata duan të dinë nëse e majta mund të qeverisë. Duan të dinë nëse problemet që i prekin mund të zgjidhen. Duan të dinë nëse ia vlen të shpresohet sërish.”
“Prandaj, të bashkuar dhe me ndjenjën e qëllimit pas nesh, ne do të bëjmë atë që njujorkezët e bëjnë më mirë se kushdo tjetër: do t’i japim botës një shembull,” theksoi kryebashkiaku.
Mamdani e dha betimin e tij në mesnatë mbi një Kuran shekullor, duke shënuar herën e parë që një kryebashkiak i Nju Jorkut betohet mbi librin e shenjtë të Islamit. Kjo shënoi gjithashtu disa “të para” historike.
Demokrati 34-vjeçar u betua në një stacion metroje prej kohësh të mbyllur, poshtë Bashkisë së qytetit, duke u bërë kryebashkiaku i parë mysliman, i pari me prejardhje nga Azia Jugore dhe i pari i lindur në Afrikë në këtë post.
Shumica e paraardhësve të tij janë betuar mbi Bibël, megjithëse ligji nuk kërkon përdorimin e ndonjë teksti fetar për betimin për respektimin e kushtetutave federale, shtetërore dhe të qytetit.
Fushata e Mamdanit u përqendrua kryesisht te çështja e kostos së jetesës. Ai ishte i hapur për besimin e tij mysliman dhe u shfaq shpesh në xhami në pesë zonat e qytetit, duke ndërtuar një bazë të fortë mbështetjeje, përfshirë shumë votues të rinj myslimanë dhe nga Azia Jugore.
Gjatë ceremonisë në metro u përdorën dy Kurane: një që i përkiste gjyshit të tij dhe një version i vogël xhepi nga fundi i shekullit XVIII ose fillimi i shekullit XIX, pjesë e koleksionit të Bibliotekës Publike të Nju Jorkut.
Mamdani fitoi zgjedhjet në fillim të nëntorit me rreth 51% të votave, pavarësisht kundërshtimit të fortë nga presidenti amerikan Donald Trump, i cili kishte kërcënuar se do t’i ndërpriste financimet qytetit në rast të fitores së tij.
Ai mposhti figura të njohura politike, përfshirë ish-guvernatorin e shtetit të Nju Jorkut, Andrew Cuomo, dhe Curtis Sliwa, kryetar i Partisë së Reformës së Nju Jorkut.
Në inaugurim morën pjesë edhe guvernatorja e Nju Jorkut, Kathy Hochul, si dhe deputetja demokrate Alexandria Ocasio-Cortez, një nga mbështetëset më të zëshme të Mamdanit.
