Profesori i filozofisë thekson rëndësinë e emrave si Nënë Tereza, Ismail Kadare dhe Lea Ypi si “pasaporta kulturore” e shqiptarëve në botë.
Profesori i filozofisë, Sead Zimeri, ka theksuar rëndësinë jetike që kanë figurat shqiptare të njohura ndërkombëtarisht për imazhin dhe përfaqësimin kulturor të shqiptarëve në botë. Sipas tij, shqiptarët kanë shumë pak emra që njihen globalisht jo si diplomatë shtetërorë, por si përfaqësues të identitetit intelektual, kulturor dhe artistik të popullit.
Zimeri thekson se këta individë duhet të trajtohen me kujdes të veçantë, sepse përmes suksesit të tyre ndërkombëtar ngritet imazhi i gjithë shqiptarëve. Ai sqaron se kjo nuk do të thotë që këta njerëz janë më të mirët apo më të mëdhenjtë ndër shqiptarë, por se kanë ndërtuar një profil të fuqishëm në arenën globale, duke bërë që përmes tyre bota të njohë edhe një popull të vogël si shqiptarët.
Një aspekt tjetër shumë i rëndësishëm, sipas profesorit, lidhet me propagandën negative që fqinjët, veçanërisht serbët, kanë ushtruar ndër vite, duke e paraqitur popullin shqiptar si primitiv dhe të pacivilizuar. Ai thotë se është e vështirë të kundërshtosh këto narrativa kur nuk ke emra të njohur botërisht për t’i përmendur si shembuj pozitivë.
“Vlera simbolike e këtyre figurave është e pafund. Një Nënë Terezë, një Ismail Kadare, një Lea Ypi janë pasaportat tona kulturore, simbolet tona të identifikimit në botë,” shprehet Zimeri. Ai shton se njohja ndërkombëtare e emrave si Lea Ypi e bën shumë më të vështirë përhapjen e propagandës antishqiptare.
Megjithatë, profesori nënvizon se këta emra nuk janë të mjaftueshëm dhe nuk zëvendësojnë arritjet e tjera shqiptare që nuk janë të njohura globalisht. Ai sjell shembullin e Dua Lipës, e cila sipas tij nuk mund ta zëvendësojë vlerën kulturore të një Shkurte Fejze.
Në fund, Zimeri thekson se pikërisht për shkak të mungesës së figurave të njohura ndërkombëtarisht, këta emra duhet të ruhen dhe respektohen “si sytë e ballit”.
