Komanda Qendrore thotë se mjeti ajror iu afrua në mënyrë agresive anijes; disa orë më vonë forcat iraniane ngacmuan edhe një anije tregtare amerikane në Ngushticën e Hormuzit.
Një aeroplan luftarak i forcave detare të Shteteve të Bashkuara ka rrëzuar një dron iranian që po i afrohej aeroplanmbajtëses “USS Abraham Lincoln” në Detin Arabik, ka bërë të ditur Komanda Qendrore e SHBA-së.
Në një deklaratë të shpërndarë përmes postës elektronike të martën, Komanda Qendrore tha se droni “iu afrua në mënyrë agresive” anijes me “qëllim të paqartë” dhe vazhdoi të fluturonte drejt saj, pavarësisht masave depërshkallëzuese të ndërmarra nga forcat amerikane që operonin në ujëra ndërkombëtare.
Sipas ushtrisë amerikane, droni i tipit “Shahed-139” u rrëzua nga një aeroplan luftarak F-35C i vendosur në aeroplanmbajtëse, e cila ndodhej rreth 800 kilometra larg bregdetit jugor të Iranit. Autoritetet thanë se nuk ka pasur të lënduar në mesin e ushtarëve amerikanë dhe nuk është raportuar për dëme materiale.
Komanda Qendrore njoftoi se incidenti ndodhi vetëm disa orë para një rasti tjetër, në të cilin forcat iraniane ngacmuan një anije tregtare me flamur dhe ekuipazh amerikan që po lundronte në Ngushticën e Hormuzit.
Sipas deklaratës, dy barka dhe një dron iranian i tipit “Mohajer” iu afruan me shpejtësi të lartë anijes “Stena Imperative”, duke rrezikuar hipjen dhe sekuestrimin e saj. Rasti është raportuar edhe nga agjencia e lajmeve Associated Press.
