Ankara thotë se çdo ndërhyrje e jashtme do të përshkallëzonte krizën, ndërsa protestat në Iran po intensifikohen.
Turqia ka paralajmëruar të hënën se çdo ndërhyrje e huaj në Iranin fqinj do të sillte pasoja edhe më të rënda për vendin dhe gjithë rajonin. Autoritetet turke kanë bërë thirrje për negociata mes Shteteve të Bashkuara dhe Iranit si mënyra e vetme për zgjidhjen e problemeve ekzistuese.
Irani po përballet me protestat më të mëdha që nga viti 2022, ndërsa presidenti amerikan Donald Trump ka kërcënuar se do të ndërhyjë nëse përdoret forcë kundër demonstruesve.
Zëdhënësi i partisë në pushtet në Turqi, AK Parti, Omer Çelik, tha se Ankaraja nuk dëshiron të shohë kaos në Iran, pavarësisht “problemeve të caktuara brenda shoqërisë dhe qeverisë iraniane”.
“Siç ka deklaruar presidenti iranian Masoud Pezeshkian, këto probleme duhet të zgjidhen përmes dinamikave të brendshme të shoqërisë iraniane dhe vullnetit kombëtar të Iranit,” u shpreh Çelik gjatë një konference për shtyp pas një takimi të partisë në pushtet.
Ai shtoi se ndërhyrja e huaj do të sillte pasoja edhe më të këqija, duke theksuar se një ndërhyrje e nxitur nga Izraeli do të përshkallëzonte edhe më tej krizën.
Ndërkohë, kryeministri izraelit Benjamin Netanyahu deklaroi se Izraeli po monitoron nga afër protestat në Iran dhe shprehu shpresën se “kombit pers do t’i vijë së shpejti çlirimi nga zgjedha e tiranisë”.
Ministri i Jashtëm turk, Hakan Fidan, tha se protestat, të cilat nisën nga vështirësi të rënda ekonomike dhe u shndërruan në thirrje për rrëzimin e establishmentit klerikal, përbëjnë një mesazh shumë të fortë për Teheranin.
“Këto demonstrata, që burojnë nga arsye reale dhe probleme strukturore, po manipulohen gjithashtu nga jashtë nga rivalët e Iranit,” deklaroi Fidan për transmetuesin shtetëror TRT.
