Parisi reagon ashpër ndaj deklaratës së shefit të NATO-s se kontinenti nuk mund të sigurohet pa mbështetjen amerikane; Uashingtoni kërkon më pak përfshirje dhe më shumë përgjegjësi nga evropianët.
Qeveria franceze ka reaguar ashpër ndaj deklaratës së Sekretarit të Përgjithshëm të NATO-s, Mark Rutte, i cili tha se Evropa nuk mund të mbrohet pa Shtetet e Bashkuara.
Ministri i Jashtëm francez, Jean-Noël Barrot, kundërshtoi drejtpërdrejt këtë qëndrim, duke theksuar se kontinenti duhet të marrë përgjegjësi për sigurinë e vet.
“Jo, i dashur Mark Rutte. Evropianët mund dhe duhet të marrin përgjegjësinë për sigurinë e tyre. Edhe Shtetet e Bashkuara janë dakord. Kjo është shtylla evropiane e NATO-s”, deklaroi ai, sipas Politico.
Të hënën, gjatë një seance në Parlamentin Evropian, Rutte tha – në përgjigje të një pyetjeje nga eurodeputeti francez i ekstremit të djathtë Pierre-Romain Thionnet – se kontinenti nuk mund të mbrohet pa mbështetjen amerikane. Ai gjithashtu kundërshtoi idenë e krijimit të një ushtrie evropiane, një koncept i rikthyer së fundmi në debat nga Komisioneri i Mbrojtjes i BE-së, Andrius Kubilius, duke e cilësuar “shtyllën evropiane të NATO-s” si një “frazë disi boshe”.
Megjithatë, që nga rikthimi i Presidentit amerikan Donald Trump në pushtet, administrata amerikane ka sinjalizuar një tërheqje graduale nga angazhimi i drejtpërdrejtë në sigurinë evropiane.
Strategjia e re e Mbrojtjes Kombëtare e SHBA-së, e publikuar së fundmi, thekson se vendet evropiane duhet të marrin drejtimin në përballjen me kërcënimet, duke argumentuar se Evropa ka kapacitete të mjaftueshme ekonomike dhe ushtarake për t’u mbrojtur nga Rusia.
Vitin e kaluar, Trump arriti të bindë aleatët evropianë që të rrisin shpenzimet për mbrojtjen deri në 5 për qind të Prodhimit të Brendshëm Bruto, si pjesë e përpjekjeve për të forcuar autonominë ushtarake të kontinentit.
