Presidenti francez ka njoftuar një ndryshim në politikën e Francës për parandalimin bërthamor: përveç rritjes së numrit të kokave bërthamore, ai njoftoi gjithashtu se aeroplanët francezë të armatosur me bomba atomike do të jenë në gjendje të stacionohen në vendet europiane që janë të gatshme të bashkëpunojnë.
Presidenti francez Emmanuel Macron ka njoftuar se vendi i tij do të rrisë numrin e kokave bërthamore në arsenalin e tij për herë të parë në dekada
Duke folur të hënën në bazën ushtarake L’Ile Longue në Francën veriperëndimore, ku ndodhen nëndetëset e raketave balistike të vendit, Macron tha se kishte vendosur të rriste numrin e kokave bërthamore nga niveli aktual prej më pak se 300.
Ai nuk specifikoi se sa do të shtoheshin. “Ne nuk do të komunikojmë më numrin e tyre”, specifikoi ai.
Kjo do të shënonte rritjen e parë të rezervave bërthamore të Francës që nga të paktën viti 1992.
Macron tha se masa kishte për qëllim sqarimin e rolit të pengesës bërthamore të Francës në arkitekturën e sigurisë së Evropës mes asaj që ai e përshkroi si kërcënime globale në rritje dhe pasiguri rreth garancive të sigurisë së SHBA-ve për aleatët evropianë.
Macron tha gjithashtu se Franca do të lejonte vendosjen e përkohshme të avionëve të saj të armatosur me armë bërthamore në vendet aleate dhe njoftoi se Franca, Gjermania dhe Mbretëria e Bashkuar do të punonin së bashku në “projekte raketash me rreze shumë të gjatë veprimi” si pjesë e bashkëpunimit më të thellë mbi aftësitë e sulmit.
Ai foli për nevojën e më shumë kokave bërthamore, përballë luftës ruse në Ukrainë, fuqizimit në rritje të kinës dhe ndryshmit të prioriteteve strategjike të SHBA.
“Zhvillimi i kapaciteteve mbrojtëse të konkurrentëve tanë, shfaqja e fuqive rajonale, mundësia e koordinimit mes kundërshtarëve dhe rreziqet që lidhen me përhapjen bërthamore; të gjitha këto, pas një shqyrtimi të kujdesshëm, më kanë çuar në këtë përfundim: forcimi i arsenalit tonë është i domosdoshëm. Kam urdhëruar rritjen e numrit të kokave bërthamore në arsenalin tonë. Për t’i dhënë fund çdo spekulimi, nuk do të bëjmë më publike shifrat e arsenalit tonë bërthamor, ndryshe nga sa mund të ketë ndodhur në të kaluarën. Për të qenë i lirë, duhet të jesh i frikësuar. Dhe për t’u frikësuar, duhet të jesh i fuqishëm. Kjo rritje e arsenalit tonë është dëshmi e kësaj. Gjermania natyrisht do të jetë një partner kyç në këtë përpjekje, më ambiciozja në frymën e Traktatit të Ahenit. Fazat e para të bashkëpunimit do të nisin këtë vit dhe mund të përfshijnë vizita në site strategjike dhe stërvitje të përbashkëta. Edhe vende të tjera e kanë pranuar këtë dialog. Përtej partnerëve dhe miqve tanë britanikë dhe gjermanë të përmendur tashmë, Polonia, Holanda, Belgjika, Greqia, Suedia dhe Danimarka do t’i bashkohen. Kjo përbën një konvergjencë të mirëfilltë strategjike mes vendeve tona, e aftë t’i japë thellësi reale mbrojtjes së kontinentit tonë”, u shpreh Macron.
Franca është fuqia e vetme bërthamore në BE
Që nga dalja e Britanisë së Madhe nga Bashkimi Evropian në vitin 2020, Franca është fuqia e vetme bërthamore e mbetur në bllok.
Sipas Institutit Ndërkombëtar të Kërkimeve për Paqen në Stokholm (SIPRI), Franca zotëron 290 nga afërsisht 12,200 armë bërthamore në të gjithë botën, duke e bërë atë fuqinë e katërt më të madhe bërthamore pas Rusisë, Shteteve të Bashkuara të Amerikës dhe Kinës.
Vendi ka katër nëndetëse të armatosura me armë bërthamore, nga të cilat mund të lëshohen raketa me koka bërthamore me një rreze veprimi prej rreth 10,000 kilometrash.
Franca gjithashtu mund të vendosë armë bërthamore nga ajri. Avionët e saj luftarakë “Rafale” mund të lëshojnë rreth 50 raketa kruz me koka bërthamore të vendit.
Zyrtarisht, këto kanë një rreze veprimi prej rreth 500 kilometrash.
