Deputeti i zgjedhur i Lëvizjes Vetëvendosje, Ilir Kërçeli, ka reaguar pas publikimit të video-incizimit ku dyshohet se dy zyrtarë të LDK-së tentojnë ta korruptojnë një delegat të partisë për të votuar kundër Lumir Abdixhikut në Kuvendin e thirrur për shkarkimin e kryetarit të LDK-së.
Në një postim në rrjetet sociale, Kërçeli e përmblodhi përmbajtjen e incizimit me fjalët:
“Një nënshkrim. Një vend pune.”
Ai tha se, sipas tij, një nënshkrim synonte të ndikonte në mundësinë e krijimit të institucioneve dhe ta çonte vendin në zgjedhje të reja.
“Kjo ishte përmbajtja e përgjimit të publikuar në emisionin Debat Plus. Një nënshkrim për të kontrolluar mundësinë e krijimit të institucioneve. Një nënshkrim për ta çuar vendin në zgjedhje të reja”, ka shkruar Kërçeli.
Sipas tij, kjo po bëhet në kurriz të taksapaguesve të kryeqytetit, ndërsa vendet e punës, që duhet të fitohen përmes meritokracisë, po shndërrohen në objekt pazari politik.
