Analisti i “Debat Plus” pranon interpretim të gabuar të fakteve dhe cenim të dinjitetit gjatë emisionit.
Sadri Ramabaja, analist në emisionin “Debat Plus”, i ka kërkuar falje publike deputetit të Partisë Demokratike të Kosovës, Përparim Grudës, pas një konfrontimi në emisionin e mbrëmshëm.
“Pata një shkarje nga natyra ime, duke u lëshuar në interpretim të gabuar të fakteve dhe të informacioneve të pjesshme që kisha në dispozicion, duke u bërë pre e logjikës së palës që përfaqësonte kolegu Përparim Gruda”, tha Ramabaja. Ai shtoi se, duke e rishikuar emisionin, është i ndërgjegjshëm për cenimin e mundshëm të dinjitetit të Grudës.
Analisti e cilëson kërkimfaljen e tij publike si një akt që tejkalon dimensionin personal dhe një kontribut për kujtesën kolektive dhe pajtimin si akt moral.
