Rezultatet paraprake tregojnë rritje për LVV dhe PDK, ndërsa LDK shënon rënie krahasuar me zgjedhjet e shkurtit 2025.
Sipas Exit Poll-it të televizionit T7, Lëvizja Vetëvendosje ka dalë e para në zgjedhje, duke marrë 43.5 për qind të votave.
Në vendin e dytë renditet Partia Demokratike e Kosovës (PDK) me 23.6 për qind, pasuar nga Lidhja Demokratike e Kosovës (LDK) me 15.9 për qind, ndërsa Aleanca për Ardhmërinë e Kosovës (AAK) ka marrë 7.2 për qind të votave.
Exit Poll-i është prezantuar nga Baton Haxhiu i Albanian Post.
Krahasuar me rezultatet e zgjedhjeve parlamentare të mbajtura në shkurt të vitit 2025, Lëvizja Vetëvendosje shënon rritje nga 42.3 për qind, ashtu si edhe PDK-ja, e cila atëherë kishte marrë 20.9 për qind të votave.
Në anën tjetër, LDK ka pësuar rënie, pasi në zgjedhjet e shkurtit kishte marrë 18.2 për qind, ndërsa AAK shënon një rritje të lehtë nga 7 për qind.
Duhet theksuar se Exit Poll-et janë projeksione dhe rezultatet përfundimtare pritet të publikohen nga Komisioni Qendror i Zgjedhjeve pas numërimit të votave.
