Qeveria në detyrë e Kosovës ka mbajtur një mbledhje elektronike, në të cilën ka marrë disa vendime, përfshirë emërime dhe ndarje të mjeteve buxhetore.
Sipas njoftimit të Zyrës së Kryeministrit, është miratuar vendimi për emërimin e anëtarëve të Këshillit të Kosovës për Raportim Financiar, me Rrezarta Korbajn në pozitën e kryesueses.
Po ashtu, qeveria ka ndarë 122 mijë euro për financimin e projekteve kapitale “Renovimi i objektit të Qendrës së Panairit në Bërnicë” dhe “Regjistri për Pronarët Përfitues”.
Në një vendim tjetër, është autorizuar pagesa prej 154 mijë eurosh për Bankën Evropiane për Rindërtim dhe Zhvillim (BERZH), për rritjen e kuotës së kapitalit të Kosovës në këtë institucion financiar ndërkombëtar.
Në total, vendimet e miratuara përfshijnë mbi 276 mijë euro financime dhe pagesa.
