Shefi ekzekutiv i OpenAI, Sam Altman, ka paralajmëruar se zhvillimi i pakontrolluar i inteligjencës artificiale mund të çojë në një të ardhme ku njerëzit do të humbin lirinë, autonominë dhe privatësinë e tyre.
Gjatë një bisede me Garry Tan në aktivitetin Startup School 2026 në San Francisko, Altman tha se, megjithëse beson se njerëzimi “me shumë gjasa do të jetë mirë”, ai është i shqetësuar për një skenar të mundshëm në dekadën e ardhshme.
“Jam veçanërisht i shqetësuar për 10 vitet e ardhshme nëse reagojmë gabimisht ndaj sigurisë së inteligjencës artificiale. Mund t’u themi njerëzve: do të keni kurë për kancerin, do të keni bollëk material, por nuk do të keni liri, nuk do të keni autonomi. Do të jetoni në një shtet të përsosur mbikëqyrjeje”, tha Altman.
Ai shtoi se në një skenar të tillë nuk do të ekzistonte më privatësia.
“Nuk do të ketë privatësi. Do të keni rehati të madhe, por nuk do të mbetet asgjë me rëndësi për ju. Thjesht do të jetoni në shërbim të inteligjencës artificiale, e cila do t’ju sigurojë pasuri materiale. Këtë do të doja ta shmangnim”, u shpreh ai.
Altman theksoi se shoqëritë mund të pranojnë lehtësisht kompromise të përkohshme në emër të sigurisë, por sipas tij, liria dhe autonomia individuale duhet të forcohen çdo vit, ndërsa inteligjenca artificiale bëhet më e fuqishme.
Deklaratat e tij kanë nxitur debat të gjerë në rrjetet sociale dhe në komunitetin e teknologjisë, pasi pjesë nga fjalimi u shpërndanë gjerësisht në internet.
