Pas 27 vitesh, Policia e Kosovës ka nisur marrjen e përgjegjësisë për sigurinë në urën kryesore mbi lumin Ibër në Mitrovicë.
Sipas burimeve të RTK-së, nga sot Policia e Kosovës ka filluar të marrë përgjegjësinë për sigurimin e urës, e cila për vite me radhë ka qenë nën përgjegjësinë e misioneve ndërkombëtare të sigurisë.
Ky zhvillim paraqet një tjetër hap në procesin e kalimit të përgjegjësive të sigurisë tek institucionet vendore.
Ura kryesore mbi lumin Ibër ka qenë për vite një nga pikat më të ndjeshme të sigurisë në Mitrovicë dhe njëkohësisht simbol i ndarjes mes pjesës jugore dhe veriore të qytetit.
Kalimi i përgjegjësive te Policia e Kosovës vjen në kuadër të zhvillimeve të fundit lidhur me rolin e institucioneve vendore në garantimin e sigurisë.
Gazeta Politika nuk ka arritur të konfirmoj në mënyrë të pavarur raportimin e RTK-së.
