Aleanca paralajmëron Moskën kundër provokimeve të mëtejshme, duke theksuar se do të përdorë të gjitha mjetet ushtarake dhe jo-ushtarake për të mbrojtur aleatët.
Aleanca e Atlantikut të Veriut ka aktivizuar nenin 4 pas shkeljes së hapësirës ajrore të Estonisë nga dy bombardues rusë. Në një deklaratë të lëshuar nga 32 vendet anëtare pas konsultimeve në Bruksel, NATO paralajmëroi Rusinë kundër provokimeve të reja, duke bërë të qartë se çdo kërcënim ndaj sigurisë së aleatëve do të përballet me përgjigje të vendosur.
“NATO dhe aleatët e saj do të përdorin të gjitha mjetet e nevojshme ushtarake dhe jo-ushtarake, në përputhje me ligjin ndërkombëtar, për të mbrojtur veten dhe për të penguar kërcënimet nga të gjitha drejtimet”, thuhet në komunikatë.
Incidenti ndodhi pas një fluturimi 12-minutësh të avionëve luftarakë rusë mbi territorin estonez, ndërkohë që mbi 20 dronë rusë u raportua se shkelën hapësirën ajrore të Polonisë. Gjithashtu, një dron rus ka depërtuar edhe në hapësirën ajrore të Rumanisë, partnere e NATO-s.
Aleanca e quajti këtë një pjesë të një “modeli veprimesh të rrezikshme dhe përshkallëzuese” nga ana e Moskës, që sipas saj rrezikojnë llogaritje të gabuara dhe jetën e qytetarëve.
Në fund të takimit, Sekretari i Përgjithshëm i NATO-s, Mark Rutte, theksoi se aleanca është plotësisht e gatshme të reagojë ndaj çdo sfide ndaj sovranitetit të saj. Ai shtoi se “çdo shkelje e hapësirës ajrore të NATO-s është e papranueshme dhe duhet të marrë përgjigjen e duhur”.
Aktivizimi i nenit 4, i cili përdoret kur një vend anëtar ndjen se integriteti territorial ose siguria e tij kërcënohet, vjen në një periudhë të tensionuar të marrëdhënieve mes Perëndimit dhe Rusisë.
