Vjosa Osmani, presidente e Kosovës, ka përkujtuar Xhemail Mustafën, ish-këshilltar i Ibrahim Rugovës, në përvjetorin e vrasjes së tij.
Osmani ka shkruar se Mustafa, që ishte një nga themeluesit e LDK-së, ishte një nga zërat më të artikuluar për liri dhe pavarësi.
Tutje, Osmani e ka quajtur vrasjen e Mustafës si “politike”, duke kërkuar zbardhjen e saj.
“Xhemail Mustafa, një nga zërat më të artikuluar për liri dhe pavarësi
Në këtë përvjetor kujtojmë me nderim Xhemail Mustafën, një nga zërat më të artikuluar të lirisë, intelektualin që me penë, guxim e vizion mbrojti idealin e Kosovës së pavarur.
Ai ishte bashkëpunëtori i palëkundur i Presidentit historik, dr. Ibrahim Rugova, dhe një prej arkitektëve të mendimit politik që na çoi drejt shtetit që kemi sot.
Por, plagët e së kaluarës nuk mbyllen pa drejtësi.
Zbardhja e kësaj vrasjeje politike nuk është vetëm kërkesë morale, por detyrim i Republikës.
Lavdi jetës, veprës dhe sakrificës së Xhemail Mustafës!” – ka theksuar Osmani.
