Kandidatja e LDK-së për deputete reagon ndaj vargut “Jam Albini, pushkë me qitë”, të kënduar nga Edona Llalloshi në tubimin e VV-së në Zvicër.
Kandidatja e Lidhjes Demokratike të Kosovës (LDK) për deputete, Sibel Halimi, ka reaguar ndaj këngës së interpretuar nga këngëtarja Edona Llalloshi në tubimin e Lëvizjes Vetëvendosje (VV) të mbajtur në Zvicër, ku ishte i pranishëm edhe kandidati i VV-së për kryeministër, Albin Kurti.
Përmes një statusi në rrjete sociale, Halimi ka kritikuar ashpër përmbajtjen e këngës, duke thënë se romantizimi i dhunës nuk përbën art dhe se arti nuk duhet të shërbejë si thirrje për të qëlluar.
“Romantizimi i dhunës nuk është art.
Arti nuk është pushkë, as thirrje për të qëlluar.
Arti është ndërgjegje, është pyetje, është dritë që e ndal dorën para dhunës.
‘Jam Albini, pushkë me qitë’, kujt do t’i drejtohen plumbat, artiste e dashur?!”, ka shkruar Halimi.
Ajo thekson se roli i artistit nuk është të nxisë dhunë, por të sfidojë padrejtësinë dhe frikën përmes ideve dhe mesazheve humane.
“‘Pushka’ e artistit nuk duhet t’i drejtohet askujt si armë, por padrejtësisë si ide, frikës si sistem, dhe heshtjes si bashkëfajësi.
Vendit i duhet paqja dhe mirëqenia, jo romantizimi i dhunës”, ka theksuar ajo.
Në fund, Halimi nënvizon përgjegjësinë morale të artistëve në shoqëri.
“Artisti ka përgjegjësi të mos bëhet jehonë e instinkteve të errëta, por zë i arsyes, i humanizmit dhe i shpresës.
Kur arti humb këtë busull, ai pushon së qeni art dhe shndërrohet në propagandë”, ka përfunduar Halimi.
