Nënkryetarja e LDK-së ndan politikanët në dy grupe, duke akuzuar Vetëvendosjen për qasje selektive ndaj Kushtetutës dhe ligjeve të shtetit.
Nënkryetarja e Lidhjes Demokratike të Kosovës, Doarsa Kica-Xhelili, ka reaguar ashpër pas zhvillimeve të fundit politike, duke bërë një ndarje të politikanëve në “dy grupe” dhe duke e akuzuar drejtpërdrejt Vetëvendosjen se e përdor ligjin dhe Kushtetutën sipas interesit të pushtetit.
Ajo thekson se grupi i parë janë ata që e vendosin shtetin mbi individët në pushtet dhe refuzojnë të normalizojnë shkeljet kushtetuese. “S’kishte qeveri legjitime, s’ishte as Kuvendi i njëjtë që kishte votuar qeverinë… Shteti pra, është mbi pushtetarët,” shkruan ajo.
Ndërsa grupin e dytë, në të cilin e pozicionon VV-në, e përshkruan si politikanë që besojnë se ligjet nuk vlejnë kur i pengojnë dhe se Kushtetuta zbatohet selektivisht. “Për ta, i gjithë shteti duhet t’i nënshtrohet një mendësie që i mbyll sytë ndaj çdo standardi shtetëror e ligjor,” shkruan Kica-Xhelili, duke iu referuar thirrjeve të VV-së: “Pse s’e votuat buxhetin?”, pa analizë ligjore e institucionale.
Ajo e mbyll reagimin e saj me qëndrimin se ndarja është fundamentale: “O e ngrisim shtetin mbi tekat e pushtetit, o presim që tekat e pushtetit të bëhen shtet.”
