Grupi Koordinues i Protestës ka publikuar një deklaratë politike me pesë kërkesa kryesore, të cilat i cilëson si të qarta, legjitime dhe të panegociueshme.
Në emër të protestuesve, grupi ka kërkuar dorëheqjen e menjëhershme të kryeministrit Edi Rama dhe të qeverisë, si dhe krijimin e një qeverie teknike tranzitore, jopartiake, me mandat 12-mujor.
Po ashtu, protestuesit kërkojnë ndryshime kushtetuese që do të miratoheshin me referendum popullor, përfshirë reformimin e Kodit Zgjedhor, ndryshimin e financimit të partive politike dhe kufizimin e mandatit të kryeministrit në maksimum dy mandate gjatë jetës politike.
Mes kërkesave janë edhe anulimi i ndryshimeve në ligjin për Zonat e Mbrojtura dhe Trashëgiminë Kulturore, shfuqizimi i “Paketës së Maleve” dhe heqja e statusit të Investitorit Strategjik.
Protestuesit kanë paralajmëruar se do të vazhdojnë protestat paqësore deri në realizimin e këtyre kërkesave.
