Rënia e shitjeve të modeleve elektrike dhe konkurrenca e fortë kineze vënë në pikëpyetje tranzicionin e BE-së drejt elektromobilitetit.
Volkswagen ka njoftuar se do të ndalojë përkohësisht prodhimin në dy fabrika të saj në Gjermani për shkak të kërkesës së dobët për veturat elektrike. Kompania do të ndërpresë operimin për shtatë ditë në mes të tetorit në uzinën e Dresdenit dhe në fabrikën e Zwickaut, ku prodhohen gjashtë modele elektrike të markave VW, Audi dhe Cupra.
Në fabrikën e tretë në Osnabrück planifikohet shkurtimi i javës së punës me një ditë, ndërsa për mbyllje të pjesshme po shqyrtohet edhe fabrika e Emdenit, ku prodhohen modelet ID.4 dhe ID.7. Ky vendim shihet si një goditje për ambiciet e Bashkimit Evropian që brenda dhjetë viteve të kalojë në një flotë kryesisht elektrike.
Situata nuk prek vetëm Volkswagenin. Edhe Stellantis – prodhuesi i Fiatit dhe Peugeotit – ka paralajmëruar ndërprerje të prodhimit në disa fabrika evropiane për arsye të ngjashme.
Sipas Shoqatës Evropiane të Prodhuesve të Automjeteve, muajin e fundit shitjet e veturave elektrike ranë, ndërsa kërkesa për modelet hibride u rrit ndjeshëm. Vetëm 16% e veturave të reja të shitura ishin elektrike, kundrejt 37% që ishin hibride. Ndërkohë, adoptimi i shpejtë në Norvegji mbetet një përjashtim, pasi në Evropën Jugore kërkesa është e dobët për shkak të infrastrukturës së kufizuar të karikimit.
Konkurrenca nga Kina po e shton presionin mbi prodhuesit evropianë. Marka BYD regjistroi rritje prej gati 250% në shitjet e saj në Evropë gjatë tetë muajve të parë të këtij viti, krahasuar me të njëjtën periudhë të vitit 2024.
