Në telefonatë të gjatë dhe gjithëpërfshirëse, udhëheqësi kinez paralajmëroi për kujdes rreth furnizimeve me armë për Tajvanin, ndërsa SHBA synon rivendosjen e partneritetit ekonomik.
Udhëheqësi i Kinës, Xi Jinping, e ka cilësuar Tajvanin si “çështjen më të rëndësishme” në marrëdhëniet midis Kinës dhe Shteteve të Bashkuara gjatë një telefonate me Presidentin amerikan, Donald Trump. Sipas mediave shtetërore kineze, Xi i tha Trumpit të jetë “i kujdesshëm” kur furnizon me armë ishullin, duke nënvizuar shqetësimet e Pekinit rreth çështjes së Tajvanit. Ai gjithashtu vlerësoi rëndësinë e lidhjeve me Uashingtonin dhe shprehu shpresën se të dy palët mund të gjejnë mënyra për të zgjidhur mosmarrëveshjet e tyre paqësisht.
Presidenti amerikan e përshkroi telefonatën e së mërkurës si “të shkëlqyer” dhe “të gjatë dhe gjithëpërfshirëse”, duke theksuar se dialogu i drejtpërdrejtë me Pekinin është i rëndësishëm për stabilitetin global. Biseda vjen pas një sërë vizitash të udhëheqësve perëndimorë në Kinë, përfshirë kryeministrin britanik Sir Keir Starmer, në përpjekje për të përmirësuar marrëdhëniet me ekonominë e dytë më të madhe në botë.
Trump konfirmoi gjithashtu se do të bëjë një vizitë në Kinë në muajin prill, një udhëtim që ai tha se e pret “me shumë padurim”. Në postimin e tij në “Truth Social”, ai shkroi se Pekini po shqyrtonte blerjen e 20 milionë tonëve sojë amerikane, krahasuar me 12 milionë tonë që blen aktualisht, si pjesë e përpjekjeve për të rritur shkëmbimet tregtare.
Përveç çështjes së Tajvanit dhe tregtisë së sojës, Trump dhe Xi diskutuan edhe temat e tjera të politikës ndërkombëtare, përfshirë luftën e Rusisë në Ukrainë, situatën në Iran dhe mundësitë e blerjes së naftës dhe gazit amerikan nga Kina, sipas deklaratave të presidentit amerikan.
