Plani 20-pikësh parasheh garanci sigurie për Ukrainën dhe opsione për zona të demilitarizuara në lindje.
Presidenti i Ukrainës, Volodymyr Zelensky, ka bërë të ditur të mërkurën (24 dhjetor 2025) detaje të planit të përditësuar të paqes që Ukraina ia ka paraqitur Rusisë, duke konfirmuar se dokumenti përfshin edhe opsione të mundshme lidhur me praninë ushtarake në lindje të vendit, raporton BBC.
Zelensky sqaroi se plani përbëhet nga 20 pika dhe është hartuar në bashkëpunim me negociatorët amerikanë gjatë bisedimeve të zhvilluara në Florida. Ai tha se pritet që pala ruse të japë përgjigje pasi Shtetet e Bashkuara të kenë zhvilluar konsultime me përfaqësuesit e Kremlinit. Ndërkohë, sipas Reuters, autoritetet ruse kanë konfirmuar se presidenti Vladimir Putin është informuar për zhvillimet e fundit.
Presidenti ukrainas e përshkroi dokumentin si “kornizë për përfundimin e luftës”, duke theksuar se ai parasheh garanci të forta sigurie për Ukrainën nga SHBA-ja, NATO-ja dhe partnerët evropianë, përfshirë një mekanizëm reagimi të koordinuar në rast të një agresioni të ri rus.
Sa i përket Donbasit lindor, Zelensky tha se po shqyrtohen disa opsione, përfshirë krijimin e një zone të demilitarizuar ose të një “zone të lirë ekonomike”. Ai theksoi se Ukraina nuk pajtohet me tërheqje të njëanshme, por se çdo zgjidhje do të kërkonte masa reciproke nga të dyja palët.
Plani i ri 20-pikësh është përditësim i një dokumenti të mëhershëm me 28 pika, i negociuar disa javë më parë nga i dërguari amerikan Steve Witkoff me palën ruse, i cili ishte kritikuar se përmbante elemente më të favorshme për kërkesat e Kremlinit.
Zelensky shtoi se çështjet më të ndjeshme, përfshirë territorin, statusin e centralit bërthamor të Zaporizhias dhe tërheqjen e trupave nga disa rajone, do të duhet të trajtohen në nivelin më të lartë politik, ndërsa theksoi se Ukraina synon një marrëveshje që garanton sovranitetin dhe sigurinë afatgjatë të vendit.
