Ministria e Jashtme e Bullgarisë ka thirrur ambasadoren e Ukrainës në Sofje pas incidentit me një dron që hyri në hapësirën ajrore bullgare dhe shpërtheu pranë kufirit me Rumaninë.
Incidenti ndodhi më 8 gusht, pranë Kardamit. Sipas autoriteteve bullgare, droni kishte hyrë në territorin e Bullgarisë nga hapësira ajrore e Rumanisë dhe kishte shpërthyer afër stacionit të kompresorit të gazsjellësit Trans-Ballkanik. Nga shpërthimi nuk pati viktima dhe nuk u raportuan dëme në infrastrukturë.
Ministria bullgare e Mbrojtjes ka bërë të ditur se analizat paraprake të mbetjeve tregojnë se bëhet fjalë me shumë gjasë për një dron të tipit “Maya”, i cili përdoret si dron mashtrues dhe është në përdorim nga forcat ukrainase.
Megjithatë, autoritetet bullgare kanë theksuar se deri më tani nuk ka asnjë indikacion se droni është drejtuar qëllimisht kundër Bullgarisë. Shefi i Mbrojtjes i Bullgarisë, admirali Emil Eftimov, ka deklaruar se incidenti nuk konsiderohet veprim i qëllimshëm kundër vendit.
Edhe Ukraina ka mohuar se ka synuar territorin bullgar. Zëdhënësi i Ministrisë së Jashtme ukrainase, Georgiy Tykhyi, ka thënë se Kievi është në kontakt me autoritetet bullgare për të sqaruar rrethanat e incidentit dhe se forcat ukrainase nuk kanë drejtuar qëllimisht mjete ajrore drejt Bullgarisë.
Bullgaria, e cila është anëtare e NATO-s, ka nisur hetimet për të përcaktuar rrethanat e sakta se si droni përfundoi në territorin e saj.
