Bashkimi Evropian e ka mirëpritur miratimin e Ligjit për Parandalimin e Pastrimit të Parave dhe Luftimin e Financimit të Terrorizmit, duke e cilësuar atë si hap përpara në rrugën e Kosovës drejt anëtarësimit në Zonën e Vetme të Pagesave në Euro – SEPA.
Ambasadori i BE-së në Kosovë, Dirk Schuebel, ka thënë se ky hap kontribuon edhe në integrimin gradual të Kosovës në Tregun e Përbashkët të Bashkimit Evropian.
“Ky është një lajm i mirë! Pasi Kosova të anëtarësohet në SEPA, pagesat dhe transfertat e parave drejt dhe nga vendet e zonës SEPA do të bëhen më të lehta, më të shpejta dhe më të lira, duke u kursyer bizneseve dhe qytetarëve kohë dhe para”, ka thënë Schuebel.
Deputetët e Kuvendit të Kosovës e kanë miratuar të enjten, në shqyrtim të dytë, Ligjin për Parandalimin e Pastrimit të Parave dhe Luftimin e Financimit të Terrorizmit.
Miratimi i këtij ligji është pjesë e veprimeve që Kosova duhet t’i ndërmarrë në procesin drejt anëtarësimit në SEPA.
