Ambasadori i Britanisë së Madhe në Kosovë, Jonathan Hargreaves, është në qendër të kritikave nga funksionarë të lartë te PDK-së.
Kritikat ndaj ambasadorit britanik lidhen me një status të tij në Facebook, ku shkroi se Gjykata Speciale shqiptoi dënime për krime individuale.
Sipas Hargreaves, dënimet në Hagë nuk përbëjnë gjykim për shtetësinë. Këto deklarata kanë ngjallur reagim të ashpër nga PDK, e cila lëshoi një komunikata kritikuese ndaj ambasadorit britanik.
Postimi i plotë i ambasadori (i përkthyer në shqip):
Në qershor të vitit 1999, trupat britanike kaluan kufirin në Hani të Elezit, si pjesë e misionit të NATO-s, të autorizuar me Rezolutën 1244 të Këshillit të Sigurimit të OKB-së, për t’i dhënë fund spastrimit etnik dhe dhunës ndaj popullatës civile në Kosovë. Politikat katastrofike të Slobodan Miloševićit çuan në krime lufte dhe represion të dokumentuar mirë në Kosovë. Qindra mijëra shqiptarë etnikë u detyruan të largoheshin nga Kosova ose u zhvendosën brenda vendit. Këshilli i Sigurimit i OKB-së, përfshirë Rusinë, shprehu vazhdimisht shqetësimin e thellë për gjendjen e rëndë humanitare. Miloševići i refuzoi të gjitha përpjekjet për arritjen e paqes, duke çuar në fushatën ajrore të NATO-s më 1999 dhe ndërhyrjen e NATO-s në Kosovë.
Mbretëria e Bashkuar është krenare për rolin e saj në Kosovë më 1999 dhe për kontributin e saj që atëherë. Ajo mbetet e palëkundur në mbështetjen për drejtësinë ndërkombëtare, llogaridhënien dhe respektimin e vendimeve të gjykatave ndërkombëtare. Kosova mori vendimin e vështirë për të themeluar dhe mbështetur Dhomat e Specializuara, duke e ditur se ato mund të hetonin disa nga figurat më të njohura të organizatave që ishin qendrore në luftën e saj çlirimtare. Kosova mund të jetë krenare për gatishmërinë e vazhdueshme për ta mbështetur parimin se askush nuk është mbi ligjin. Ky është një shembull i rëndësishëm për gjithë rajonin.
Dënimet e fundit kanë të bëjnë me krime individuale të kryera ndaj viktimave nga komunitete të ndryshme. Ato në asnjë mënyrë nuk përbëjnë gjykim për shtetësinë, sovranitetin apo të drejtën e Kosovës për ta përcaktuar të ardhmen e saj — të cilat Mbretëria e Bashkuar do të vazhdojë t’i mbrojë me vendosmëri. Të dënuarit kanë të drejtë të apelojnë aktgjykimet.
Mbretëria e Bashkuar mbetet e përkushtuar fuqishëm ndaj së vërtetës për Ballkanin Perëndimor dhe pajtimit të qëndrueshëm. Do të vazhdojmë të punojmë me partnerë në mbarë rajonin dhe në nivel ndërkombëtar, në mbështetje të paqes, drejtësisë dhe një të ardhmeje të begatë për të gjitha komunitetet.
