Kryeministri vlerëson kontributin e vokalistit të “Ilirëve”, duke e cilësuar si një zë që u bë kujtesë kolektive dhe gjuhë emocioni për shqiptarët kudo.
Kryeministri i Kosovës, Albin Kurti, ka reaguar pas ndarjes nga jeta të këngëtarit të njohur Shemsi Krasniqi – Shemi, duke e cilësuar atë si një zë që ka hyrë në shtëpitë dhe zemrat e shqiptarëve “pa trokitur”.
Në mesazhin e tij ngushëllues, Kurti theksoi se si vokalist i grupit legjendar “Ilirët”, Shemi i dha fytyrë një etape të rëndësishme të muzikës shqiptare dhe krijoi një ndjenjë bashkimi mes publikut, edhe në kohët kur shqiptarët ishin fizikisht larg njëri-tjetrit.
Ai vuri në pah se përmes interpretimit të tij, kënga u shndërrua në kujtesë kolektive, ndërsa kujtesa në këngë, duke veçuar veprën “Xhamadani vija-vija” si simbol identiteti dhe bashkimi për shqiptarët kudo që jetojnë.
“Sot e kuptojmë edhe më shumë se sa rrallë lindin zëra që nuk janë vetëm art, por bëhen gjuhë e përbashkët e emocioneve shpirtërore”, u shpreh Kurti, duke shtuar se humbja e një artisti të tillë është pikëllim mbarëkombëtar.
Kryeministri shprehu ngushëllimet më të sinqerta për familjen Krasniqi, miqtë, bashkëpunëtorët dhe gjithë publikun që e deshi dhe e vlerësoi veprën e Shemit, duke bërë thirrje që ai të nderohet me respektin që i takon, përmes kujtimit dhe mirënjohjes.
“Disa zëra nuk mbarojnë me një lajm, ata vazhdojnë sa herë që një këngë ngrihet si flamur në zemër”, përfundoi Kurti, duke theksuar se zëri i Shemit do të dëgjohet përherë në shpirtin e muzikës shqiptare.
Shemsi Krasniqi – Shemi u nda nga jeta, por trashëgimia e tij artistike mbetet e gjallë. U prehtë në paqe. I lehtë i qoftë dheu.
