Kryetari i Prishtinës akuzon Kurtin për arrogancë dhe përpjekje për të ndëshkuar komunat e udhëhequra nga parti të tjera, duke e quajtur deklaratën e tij “rrezik institucional”.
Kryetari i Prishtinës, Përparim Rama, ka reaguar ashpër ndaj deklaratës së kryeministrit në detyrë Albin Kurti, i cili kishte thënë se “nuk do të japë buxhet për ata që nuk dinë të punojnë”, duke iu referuar kryetarëve të komunave që nuk i përkasin partisë së tij.
Në një reagim të publikuar në rrjete sociale, Rama e ka quajtur këtë deklaratë “skandaloze”, duke e akuzuar Kurtin se po e trajton buxhetin e shtetit si pronë partiake.
“Deklarata ‘nuk e jap buxhetin për…’ është skandaloze. Cilin buxhet, Albin? Buxhetin e kujt ‘s’e jep’? Të popullit që e mban këtë shtet me tatime, punë dhe durim, apo të partisë që e ke shndërru në pronë private?”, ka shkruar Rama.
Ai shtoi se Kurti tashmë ka pranuar publikisht atë që, sipas tij, po ndodh prej dy vitesh:
“Albin Kurti e tha më në fund me zë të lartë atë që unë kam alarmuar prej dy vitesh: ‘S’ka para, s’ka përkrahje, s’ka zhvillim për komunat që s’janë me ne.’”
Rama theksoi se buxheti i shtetit nuk është shpërblim apo ndëshkim, por një detyrim kushtetues.
“Në demokraci, kush e përdor paranë publike për të ndëshkuar kundërshtarët, është autokrat që fshihet pas fjalëve populliste. Kjo nuk është më politikë, është rrezik institucional!”
Duke iu drejtuar Kurtit drejtpërdrejt, kryetari i Prishtinës tha se “ish-kryeministri po flet si pronar” dhe se një qasje e tillë rrezikon demokracinë.
“Kur ish-kryeministri flet si pronar, qytetari humb statusin e sovranit. Aty ku qytetari humb, fillon kultivimi i një autokracie të rrezikshme që ushqehet nga servilizmi, frika dhe përfitimi,” tha ai.
Në përfundim, Rama e akuzoi Kurtin për arrogancë politike dhe për krijimin e një rrethi të mbyllur me njerëz që i ushqejnë egon.
“Albin Kurti, pushteti nuk është pasqyrë për t’u admiruar. Është provim që e ke dështuar me arrogancë. Ata që i ke pranë, servilët dhe të padijshmit, ndoshta ta kanë krijuar përshtypjen se je figurë superiore, i pazëvendësueshëm, mbi ligjin dhe mbi kushtetutën. Por nuk je,” shkroi Rama, duke theksuar se Kosova është shtet demokratik dhe duhet të trajtojë të gjitha komunat në mënyrë të barabartë.
