Lëvizja ushtarake vjen mes bisedimeve SHBA–Iran për programin bërthamor në Gjenevë.
Ushtria e Shtetet e Bashkuara ka zhvendosur dhjetëra aeroplanë luftarakë drejt Lindjes së Mesme gjatë 24 orëve të fundit, sipas të dhënave me burim të hapur për përcjelljen e fluturimeve.
Sipas raportimit të The Times of Israel, ky zhvillim ndodh në kohën kur SHBA-ja dhe Irani zhvilluan rundin e dytë të bisedimeve në Gjenevë, rreth programit bërthamor të Teheranit.
Në mesin e aeroplanëve të zhvendosur përfshihen tipat F-22, F-35 dhe F-16, ndërsa janë vërejtur edhe disa aeroplanë për rimbushje me karburant. Sipas mediumit amerikan Axios, një zyrtar amerikan ka konfirmuar se më shumë se 50 aeroplanë luftarakë janë zhvendosur në rajon brenda 24 orëve të fundit.
Negociatorët u mblodhën në Gjenevë në kohën e një grumbullimi të konsiderueshëm të forcave amerikane në rajon. Presidenti amerikan, Donald Trump, ka kërcënuar disa herë me përdorimin e forcës ushtarake kundër Iranit, fillimisht për shkak të shtypjes së protestave dhe më pas për shkak të programit bërthamor të Teheranit.
Ndërkohë, ministri i Jashtëm i Iranit deklaroi se palët janë pajtuar për disa “parime udhëzuese” gjatë bisedimeve, por theksoi se kjo nuk do të thotë se një marrëveshje është afër.
