Analisti thekson se bastionet historike mbeten të sigurta, por gara në Prishtinë, Fushë Kosovë dhe Obiliq pritet e ashpër me LVV.
Analisti politik Shenoll Muharremi ka komentuar performancën zgjedhore të Lidhjes Demokratike të Kosovës (LDK) në zgjedhjet për kryetarë komunash 2025, duke krahasuar rezultatet preliminare me raundin e parë të vitit 2021. Ai ka vlerësuar se LDK ka ruajtur bazën e vet tradicionale dhe mbetet partia më e qëndrueshme në raport me 2021.
Sipas Muharremit, Prishtina mbetet pika e fortë, megjithëse gara është e barabartë me kandidatin e LVV dhe balotazhi pritet i ashpër. Istogu dhe Lipjani janë dy komuna të tjera me performancë të fortë, ndërsa Peja vazhdon të dominohet nga LDK megjithë një rënie të votave. Në Prizren është shënuar tkurrje prej -2,881 votash, ndërsa në Rahovec dhe Ferizaj ka rritje.
Veriu mbetet një rajon problematik për LDK, ku ka rënie të votave, ndërsa Fushë Kosova dhe Obiliqi paraqesin balotazhe të nxehta për shkak të rritjes së përkrahjes së LVV.
Përmbledhtas, trendi tregon një rënie të lehtë prej -3,856 votash (-2.05%) krahasuar me vitin 2021, duke treguar stabilitet elektoral pa rritje të ndjeshme, sipas Muharremit. Bastionet e partisë si Istog, Lipjan, Pejë dhe Prishtinë mbeten të sigurta, por partia duhet të monitorojë me kujdes rajonin qendër përballë rritjes së LVV.
Performanca komunale sipas Muharremit:
Fitore me rritje votash: Prishtinë (+9,645), Istog (+2,084), Ferizaj (+1,982), Rahovec (+1,173) Rënie votash: Gjilan (-3,785), Mitrovicë (-2,490), Prizren (-2,881), Pejë (-4,391), Vushtrri (-4,102)
Muharremi thekson se rezultatet përfundimtare mund të ndryshojnë, pasi këto janë të dhëna preliminare që nuk përfshijnë votat e diasporës dhe votat me kusht, ndërsa qëllimi është të kuptohen trendet kryesore dhe lëvizjet në komunat e vendit krahasuar me 2021.
