Senatori republikan amerikan Lindsey Graham ka ndërruar jetë në moshën 71-vjeçare, pas një sëmundjeje të shkurtër dhe të papritur, ka bërë të ditur zyra e tij në një deklaratë zyrtare.
“Familja e senatorit Graham falënderon për lutjet në këtë kohë dhe kërkon privatësi gjatë kësaj periudhe jashtëzakonisht të vështirë”, thuhet në deklaratë.
I zgjedhur në Senatin amerikan në vitin 2002, republikani nga Karolina e Jugut ishte një nga figurat më me ndikim të politikës së jashtme në Uashington dhe një prej aleatëve më të afërt të presidentit Donald Trump.
Vetëm një ditë para vdekjes, Graham ishte kthyer nga një vizitë në Kiev, ku ishte takuar me presidentin ukrainas Volodymyr Zelensky për të diskutuar sanksione të reja ndaj Rusisë dhe mbështetjen amerikane për Ukrainën. Nuk ishte raportuar për ndonjë problem shëndetësor para udhëtimit të tij.
Pas lajmit për vdekjen, Donald Trump e quajti Grahamin një “patriot të vërtetë amerikan”, duke e vlerësuar për kontributin e tij në politikën amerikane.
Graham kishte shërbyer edhe si kryetar i Komisionit të Senatit për Buxhetin dhe ishte një nga mbështetësit më të zëshëm të ndihmës amerikane për Ukrainën. Në vitin 2023 ai kishte deklaruar se “Putini nuk do të ndalet në Ukrainë” dhe se dobësia ndaj Rusisë do të kishte pasoja edhe për Tajvanin.
