Deputetja e zgjedhur e Lidhjes Demokratike të Kosovës (LDK), Jehona Lushaku-Sadriu, ka thënë se kërkesa e partisë së saj në raport me negociatat me Lëvizjen Vetëvendosje është që ta kenë postin e presidentit.
Lushaku-Sadriu foli para mbledhjes së Grupit Parlamentar të LDK-së një ditë para seancën konstituive të Kuvendit.
“LDK-ja gjithmonë ka thënë se institucionet kryesore të kenë balancë. Edhe në këtë kuptim, kërkesa jonë është që presidenti t’i takojë LDK-së dhe pushteti të ndahet në mënyrë proporcionale”, ka thënë Lushaku-Sadriu.
E pyetur nëse sot do të ketë takim tjetër mes kryetarit të LDK-së, Lumir Abdixhiku dhe kryeministrit në detyrë, Albin Kurti, ajo ka thënë se nuk ka dijeni.
Një ditë më parë, Abdixhiku pas takimit treorësh që pati me Kurtin deklaroi se nuk janë të interesuar për postin e kryetarit të Kuvendit.
