Publicisti Emver Robelli ka kritikuar atmosferën që, sipas tij, u krijua rreth debatit për Ligjin për Dhomat e Specializuara, duke thënë se ata që paralajmëronin se nisma nuk do të sillte efekt juridik do të përballeshin me fushatë linçimi.
“Imagjinoni sikur para dy javësh të dilte ndonjë gazetar i pavarur, ndonjë përfaqësues i denjë i shoqërisë civile apo një figurë publike e të thoshte hapur: ligji për ‘gjykatën speciale’ nuk do të sjellë bash asgjë, është shkruar dobët, synon vetëm manipulimin e masave, (keq)përdoret për efekte elektorale dhe rrezikon të mbetet në sirtar e të pluhuroset”, ka shkruar Robelli.
Sipas tij, personi që do ta thoshte këtë do të etiketohej si “armik i Kosovës” dhe “shërbëtor i Serbisë”, ndërsa do të përballej me sulme ndaj tij dhe familjes.
Robelli e krahasoi atë atmosferë me reagimet e tanishme, pasi komisionerja e BE-së për Zgjerim e cilësoi ligjin e miratuar në Kuvend si “të papranueshëm”. Ai rikujtoi edhe deklaratat e mëhershme të Bashkimit Evropian, i cili kishte shprehur “shqetësim të thellë” dhe kishte thënë se ndryshimet bien ndesh me detyrimet ndërkombëtare të Kosovës.
“Përveç ndonjë pëshpërime, çarshia politike e Prishtinës tani është e heshtur. Është e njëjta kasaba që para dy javësh ishte e zhurmshme, agresive e kërcënuese”, shkroi Robelli.
Ai tha se gjatë debatit nuk kishte hapësirë për mendim racional dhe kritikë të bazuar në fakte.
“Sepse nuk lejohej debati. Ose synohej pamundësimi i debatit”, theksoi ai.
Në fund, Robelli ngriti pyetjen nëse duhet nxjerrë mësim nga kjo përvojë, duke vlerësuar se problemet mbeten të pazgjidhura dhe se “strategjia nuk shihet në horizont”.
