Presidenti amerikan vë në pikëpyetje sanksionin 120 milionë euro ndaj platformës së Elon Musk, ndërsa BE-ja mbron vendimin si proporcional dhe në mbrojtje të standardeve digjitale.
Presidenti i Shteteve të Bashkuara, Donald Trump, e ka cilësuar “një gjobë të keqe” sanksionin prej 120 milionë eurosh që Bashkimi Evropian i vendosi platformës së mediave sociale X, në pronësi të Elon Musk, për shkelje të rregullave të përmbajtjes online. Duke folur para gazetarëve në Shtëpinë e Bardhë, Trump u shpreh se nuk e kupton se si një vendim i tillë mund të justifikohet dhe paralajmëroi se “Evropa po shkon në disa drejtime të këqija”.
Ai tha se priste një raport të plotë mbi çështjen gjatë ditës, ndërsa theksoi se Musk nuk e kishte kontaktuar për të kërkuar mbështetje. “Nuk e kuptoj se si mund ta bëjnë këtë. Evropa duhet të jetë shumë e kujdesshme,” shtoi presidenti amerikan.
Reagimi i Trump vjen pas kundërshtimit të hapur të Elon Musk, i cili në platformën X e quajti vendimin e Komisionit Evropian “Gabim”, ndërsa ripostoi mesazhe kritike ndaj sanksionit. “Liria e fjalës është themeli i demokracisë. E vetmja mënyrë për të ditur për çfarë po voton,” shkroi Musk, duke argumentuar se vendimi cenon parimet demokratike.
Vendimi ka ngjallur reagime dhe në institucionet amerikane. Sekretari i Shtetit, Marco Rubio, dhe kreu i FCC-së, Brendan Carr, e dënuan masën e BE-së, duke e cilësuar si një goditje të padrejtë ndaj kompanive amerikane.
Megjithatë, Bashkimi Evropian ka mbrojtur vendimin. Shefja e teknologjisë së BE-së, Henna Virkkunen, tha se sanksioni është “proporcional”, ndërsa Komisioni Evropian theksoi se rregullat nuk janë të drejtuara kundër ndonjë kombësie specifike, por synojnë mbrojtjen e “standardeve digjitale dhe demokratike”.
Ndërkohë, TikTok – i cili në maj u akuzua për shkelje të ngjashme në depozitimin e reklamave – shmangu një gjobë duke premtuar përmirësime dhe duke kërkuar që rregullat të zbatohen në mënyrë të barabartë për të gjitha platformat.
