Policia e Kosovës ka zhvilluar një aksion në gjashtë lokacione të ndryshme në Mitrovicën e Jugut, nën dyshimin për organizim të lojërave të fatit dhe skemave piramidale, shkruan KOHA.
Sipas raportit policor, kontrollet janë kryer të premten, në pronat e tre personave të dyshuar.
Gjatë aksionit janë gjetur dhe konfiskuar nëntë telefona dhe pajisje elektronike, një pajisje DVR për kamerat e sigurisë, 6 mijë e 844 euro e 80 centë, një pistoletë me 10 fishekë, një automjet, si dhe rreth 10 gramë substancë që dyshohet të jetë narkotike.
Po ashtu, janë sekuestruar katër mullinj për bluarjen e narkotikëve, një cigare me substancë narkotike, një valixhe me pajisje për bixhoz, përfshirë letra dhe çipa, nëntë kartela bankare, 21 dokumente të ndryshme dhe një sprej OC.
Në lidhje me rastin, tre të dyshuarit janë arrestuar dhe, me vendim të prokurorit, janë dërguar në mbajtje.
