Ish-ambasadori i Kosovës në Maqedoninë e Veriut, Gjergj Dedaj, ka hedhur akuza të rënda ndaj procesit zgjedhor të 7 qershorit, duke pretenduar se rezultati është manipuluar.
Përmes një reagimi publik, Dedaj ka kërkuar që partitë opozitare të diskutojnë mundësinë e mosnjohjes së rezultatit zgjedhor.
“Opozita ta diskutojë mosnjohjen e rezultatit të manipuluar e të blerë të 7 qershorit”, ka shkruar ai.
Dedaj ka akuzuar Lëvizjen Vetëvendosje për blerje votash brenda Kosovës dhe manipulim të votave në diasporë dhe në përfaqësitë diplomatike.
“LVV votat në Kosovë i ka blerë, kurse në përfaqësitë diplomatike dhe në diasporë masovikisht i ka vjedhur dhe manipuluar”, ka deklaruar ai.
Ai nuk ka paraqitur prova publike për këto pretendime, ndërsa institucionet përgjegjëse për administrimin dhe mbikëqyrjen e zgjedhjeve nuk kanë raportuar për parregullsi që do të cenonin rezultatin e përgjithshëm të procesit zgjedhor.
